ભાવનગરમાં ROBOFEST-GUJARAT 6.0નો સમાપન સમારોહ યોજાયો
AI આધારિત રોબોટિક્સ હેકાથોનની વિજેતા ટીમો લાખોના ઇનામથી સન્માનિત
મંત્રી અર્જુન મોઢવાડિયા અને જીતુ વાઘાણીની ઉપસ્થિતિમાં કાર્યક્રમ યોજાયો
ભાવનગરમાં ROBOFEST-GUJARAT 6.0નો સમાપન સમારોહ યોજાયો, AI આધારિત રોબોટિક્સ હેકાથોનમાં વિજેતા ટીમોને લાખો રૂપિયાનાં ઇનામ આપી સન્માનિત કરાઇ, મંત્રી અર્જુન મોઢવાડિયા અને જીતુ વાઘાણીની ઉપસ્થિતિમાં કાર્યક્રમ યોજાયો; પોરબંદરમાં મરીન કોરિડોર માટે રૂપિયા 100 કરોડના ખર્ચે MOU સાઇન કરાયા,
વિજ્ઞાન, ટેક્નોલોજી અને આર્ટિફિશિયલ ઇન્ટેલિજન્સ (AI)ના ક્ષેત્રમાં યુવાનોને નવીન સંશોધન માટે પ્રોત્સાહિત કરવાના હેતુથી ભાવનગરના રિજનલ સાયન્સ સેન્ટર ખાતે યોજાયેલી ROBOFEST-GUJARAT 6.0 હેકાથોનનો સમાપન સમારોહ અને ઇનામ વિતરણ કાર્યક્રમ યોજાયો હતો. આ કાર્યક્રમમાં મંત્રી અર્જુન મોઢવાડિયા અને જીતુ વાઘાણી ઉપસ્થિત રહ્યા હતા. આ પ્રસંગે સ્પર્ધામાં શ્રેષ્ઠ પ્રદર્શન કરનાર પ્રથમ, દ્વિતીય અને તૃતીય ક્રમે વિજેતા ટીમોને ઇનામ, પ્રમાણપત્ર અને મોમેન્ટો આપી પ્રોત્સાહિત કરવામાં આવી હતી. ગુજરાત કાઉન્સિલ ઓન સાયન્સ એન્ડ ટેક્નોલોજી (GUJCOST) દ્વારા આયોજિત આ હેકાથોન 7થી 9 ઓક્ટોબર દરમિયાન યોજાઈ હતી. આ વખતે હેકાથોનની થીમ ‘AI-Powered Robotics Innovation Challenge’ રાખવામાં આવી હતી. જેમાં ગુજરાત સહિત દેશનાં અન્ય છ રાજ્યોની કુલ 52 ટીમોએ ભાગ લીધો હતો. ભાવનગરની પણ બે ટીમોએ આ સ્પર્ધામાં પોતાની ટેક્નિકલ ક્ષમતા અને નવીન વિચારો રજૂ કર્યા હતા. આ હેકાથોનનો મુખ્ય ઉદ્દેશ્ય આર્ટિફિશિયલ ઇન્ટેલિજન્સ અને રોબોટિક્સના ક્ષેત્રમાં વિદ્યાર્થીઓ તથા યુવા ઇનોવેટર્સને નવીન ઉકેલો વિકસાવવા માટે પ્રોત્સાહિત કરવાનો હતો. 36 કલાક દરમિયાન વિવિધ ટીમોએ AI અને રોબોટિક્સ આધારિત પ્રોજેક્ટ્સ પર કામ કરીને પોતાની સર્જનાત્મકતા, ટેક્નિકલ ક્ષમતા અને સંશોધન કૌશલ્યનું પ્રદર્શન કર્યું હતું. આ આયોજન દ્વારા યુવાનોને આધુનિક ટેક્નોલોજી ક્ષેત્રે નવીન પ્રયોગો કરવાની તક મળી હતી. સાથે જ સ્વદેશી રોબોટિક્સ ટેક્નોલોજીની ક્ષમતાને મજબૂત બનાવવા અને દેશના યુવા સંશોધકોને એક મંચ પર લાવવાનો પ્રયાસ કરવામાં આવ્યો હતો. વિજેતા ટીમોને લાખો રૂપિયાનાં ઇનામ હેકાથોનમાં તૈયાર કરવામાં આવેલા પ્રોજેક્ટ્સના મૂલ્યાંકન બાદ શ્રેષ્ઠ પ્રદર્શન કરનાર ટીમોને પુરસ્કાર આપવામાં આવ્યા હતા. જેમાં પ્રથમ ક્રમે આવેલી ટીમને રૂપિયા 10 લાખ, દ્વિતીય ક્રમે આવેલી ટીમને રૂપિયા 7.5 લાખ અને તૃતીય ક્રમે આવેલી ટીમને રૂપિયા 5 લાખનું ઇનામ આપવામાં આવ્યું હતું. આ ઉપરાંત વિજેતા ટીમોને પ્રમાણપત્ર અને મોમેન્ટો આપી સન્માનિત કરવામાં આવી હતી. ROBOFEST-GUJARAT 6.0ના આયોજનથી ભાવનગરને વિજ્ઞાન, રોબોટિક્સ અને આર્ટિફિશિયલ ઇન્ટેલિજન્સ ક્ષેત્રે નવીન સંશોધન માટેનું મહત્વપૂર્ણ પ્લેટફોર્મ મળ્યું છે. દેશભરની ટીમોની ભાગીદારીથી યુવા ઇનોવેટર્સને પોતાના વિચારો રજૂ કરવાની અને ટેક્નોલોજીના ક્ષેત્રમાં આગળ વધવાની તક મળી હતી.
આ કાર્યક્રમના પ્રસંગે બ્લુ બાયો ઇકોનોમીને વેગ આપવાના હેતુથી રાજ્ય સરકારના નિર્ણય અંતર્ગત પોરબંદરમાં રૂપિયા 100 કરોડના ખર્ચે મરીન કોરિડોર વિકસાવવા માટે MOU પર હસ્તાક્ષર કરવામાં આવ્યા હતા. મંત્રી અર્જુન મોઢવાડિયા અને જીતુ વાઘાણીની ઉપસ્થિતિમાં આ પ્રક્રિયા હાથ ધરાઈ હતી. આમ, ભાવનગરમાં રોબોટિક્સ અને AI ક્ષેત્રે યુવાનોને પ્રોત્સાહિત કરવાના કાર્યક્રમની સાથે મરીન ક્ષેત્રના વિકાસને લગતી પહેલ પણ ચર્ચામાં રહી હતી…