જામનગરમાં નોંધાયેલા ગુનામાં સંડોવાયેલા આરોપી સુરતમાંથી ઝડપાયો
લોકો પાસે પોલીસના નામે રૂપિયા પડાવ્યો હતો
પોલીસે હરેશ ઉર્ફે નશુ હિંમતભાઈ ખેરાળાને ઝડપી લીધો
જામનગરની ખોડીયાર કોલોનીમાં બે મહિના અગાઉ એક વ્યક્તિને હનીટ્રેપમાં ફસાવી રૂ.૭.૨૫ લાખ પડાવવાના ગુનામાં વોન્ટેડ સુરતના યુવાનને સુરત શહેર એસઓજીએ ઝડપી પાડી તેનો કબજો જામનગર પોલીસને સોંપ્યો છે.હનીટ્રેપના આ બનાવમાં પોલીસ બનીને ગયેલો યુવાન અગાઉ પણ પકડાયો છે અને વર્ષો અગાઉ માલેતુજાર ગે ને પણ ફસાવી પૈસા પડાવતા પકડાયો હતો.
એસઓજીની ટીમે બાતમીના આધારે કાપોદ્રા ચાર રસ્તા પાસેથી હરેશ ઉર્ફે નશુ હિંમતભાઈ ખેરાળાને ઝડપી લીધો હતો.એસઓજીએ તેની પુછપરછ કરતા જાણવા મળ્યું હતું કે હમવતની મિત્ર હિતેન ચોહાણ અને તેની માતા સંગીતાબેન તેમજ કાળુભાઈ બારૈયા તથા હિતેનના બીજા મિત્ર સાથે મળી તેઓ લોકોને હનીટ્રેપમાં ફસાવી પોલીસના નામે પૈસા પડાવે છે.બે મહિના પહેલા તે મિત્ર હિતેન ચૌહાણ સાથે જામનગર ગયો હતો અને ત્યાં હિતેને તેની માતા સંગીતાબેને એક વ્યક્તિને જામનગર ખોડીયાર કોલોની ખાતે એક મકાનમાં ખોટા કામ માટે બોલાવ્યો છે અને આપણે ત્યાં પોલીસ બનીને રેડ કરવાની છે તેમ કહેતા તે સાથે ગયો હતો. બાદમાં તે હિતેન, રાજુ, નિતીન રબારી તથા અન્ય બે અજાણ્યા સાથે જામનગર ખોડીયાર કોલોનીના એક મકાનમાં ઘુસ્યો હતો અને ત્યાં રૂમમાં એક વ્યક્તિ તથા હિતેનની માતા કંઢગી હાલતમાં હોય બધાએ પોલીસની ઓળખ આપી તે વ્યક્તિને બળાત્કારના કેસમાં ફસાવી દેવાની ધમકી આપી રૂ.૬ લાખ આંગડીયા મારફતે મંગાવ્યા હતા અને બીજા રૂ.૧.૨૫ લાખ પણ ધમકી આપી કાળુભાઈ બારૈયાનાએ કઢાવ્યા હતા. જામનગર સીટી સી પોલીસ સ્ટેશનમાં નોંધાયેલા ગુનામાં તે વોન્ટેડ હોય એસઓજીએ તેનો કબ્જો જામનગર પોલીસને સોંપ્યો હતો.સાડી ઉપર સ્ટોન લગાવવાનું કામ કરતો હિરેન સુરતના જહાંગીરપુરા અને સારોલી પોલીસ મથકમાં પણ હનીટ્રેપ્તા ગુનામાં ઝડપાયો છે. તેમજ વર્ષો અગાઉ તે માલેતુજાર ગે ને પણ ફસાવી પૈસા પડાવતા પકડાયા હતા.