સુરતમાં નવરાત્રીને લઇ ગ્રામ્ય પોલીસનો ચુસ્ત બંદોબસ્ત
નવરાત્રિમાં સુરત જિલ્લા પોલીસની સતર્કતા
કોસંબા-કીમ સહિત સંવેદનશીલ વિસ્તારોમાં વાહન ચેકિંગ
જિલ્લા પોલીસ વડાએ કર્યું નિરીક્ષણ
સુરત: નવરાત્રીના પાવન પર્વ નિમિત્તે લોકો પરિવાર સાથે ગરબા અને માતાજીની આરાધના સુરક્ષિત રીતે કરી શકે તે હેતુથી સુરત ગ્રામ્ય જિલ્લા પોલીસ દ્વારા ચુસ્ત સુરક્ષા વ્યવસ્થા ગોઠવવામાં આવી છે. જિલ્લા પોલીસ વડા શ્રી રાજેશ ગઢિયા સાહેબના માર્ગદર્શન હેઠળ પોલીસની ટીમો સઘન પેટ્રોલિંગ અને વાહન ચેકિંગ કરી રહી છે.
વાહન ચેકિંગ અને અવાવરુ જગ્યા પર પેટ્રોલિંગ: નવરાત્રી દરમિયાન દારૂ પીને વાહન ચલાવતા અસામાજિક તત્વોને રોકવા માટે જિલ્લાના જુદા જુદા પોઈન્ટ્સ પર બ્રેથ એનાલાઇઝરનો ઉપયોગ કરીને વાહન ચેકિંગની કામગીરી હાથ ધરવામાં આવી છે. આ ઉપરાંત, લોકોની સુરક્ષાને ધ્યાનમાં રાખીને અવાવરુ અને નિર્જન જગ્યાઓ પર પોલીસ દ્વારા સઘન પેટ્રોલિંગ પણ કરવામાં આવી રહ્યું છે. મહિલાઓની સુરક્ષા માટે ‘શી ટીમ’ તૈનાત: ગરબાના સ્થળો પર મહિલાઓ અને છોકરીઓની સુરક્ષા સુનિશ્ચિત કરવા માટે ખાસ *’શી ટીમ’*ની ટુકડીઓ તૈનાત કરવામાં આવી છે. આ ટીમો સાદા ડ્રેસમાં પણ ગરબા સ્થળોની આસપાસ હાજર રહેશે, જેથી કોઈપણ અસામાજિક તત્વ મહિલાઓની છેડતી ન કરી શકે. પોલીસનો આ પ્રયાસ મહિલાઓમાં સુરક્ષાની ભાવના મજબૂત કરશે. જિલ્લા પોલીસ વડા શ્રી રાજેશ ગઢિયાએ પોતે રાત્રિ દરમિયાન તમામ સુરક્ષા પોઈન્ટ્સ અને ગરબા સ્થળોની મુલાકાત લીધી હતી. તેમણે પોલીસ અધિકારીઓ અને કર્મચારીઓને ફરજપૂર્વક અને ચુસ્ત બંદોબસ્ત જાળવવા માટે સૂચના આપી હતી. તેમના આ નિરીક્ષણથી પોલીસ દળનો જુસ્સો વધ્યો છે અને સુરક્ષા વ્યવસ્થા વધુ સુદૃઢ બની છે. આ પગલાંથી જિલ્લાની જનતામાં સુરક્ષાની લાગણી વધુ મજબૂત બની છે.