ગાંધીનગર રાયપુરમાં બાળકીની હત્યામાં મોટો ખુલાસો
આરોપી પાડોશી અનિલની પૂછપરછમાં થયા ખુલાસા
આરોપીએ દીકરીને લલચાવી બોલાવી હતી ઘરે
ગાંધીનગરના રાયપુરમાં બાળકીની હત્યાના કેસમાં પોલીસે સનસનાટીપૂર્ણ ખુલાસો કર્યો છે.
ગાંધીનગરના રાયપુરમાં પોલીસે બાળકીના પાડોશી અનિલ દેવીપૂજક નામના આરોપીની ધરપકડ કરી છે. પોલીસ તપાસમાં સામે આવ્યું છે કે બાળકીના પરિવાર સાથે અગાઉ થયેલા સામાન્ય ઝઘડાનો બદલો લેવાના ઇરાદે આરોપી અનિલે આ ભયાનક કૃત્યને અંજામ આપ્યો હતો. આ ઘટનાએ સમગ્ર વિસ્તારમાં ચકચાર મચાવી દીધી છે, કારણ કે પાડોશીએ જ આટલું ઘૃણાસ્પદ પગલું ભર્યું હતું. પોલીસના ખુલાસા મુજબ, આરોપી અનિલ દેવીપૂજકે પહેલા બાળકીનું અપહરણ કર્યું હતું. ત્યારબાદ તેણે માસૂમ બાળકીને ગળેફાંસો આપીને તેની હત્યા કરી દીધી હતી. હત્યા કર્યા પછી, કોઈને જરાય શંકા ન જાય તે માટે આરોપીએ બાળકીના મૃતદેહને એક કોથળીમાં ભર્યો હતો. આટલેથી ન અટકતાં, અનિલે વધુ નૃશંસતા દાખવતા, યોગ્ય તક જોઈને તે લાશ ભરેલી કોથળીને અન્ય એક પાડોશીના મકાનમાં મૂકી દીધી હતી, જેથી પોલીસ તપાસની દિશા બદલાઈ જાય અને તેના પર કોઈ આંગળી ચીંધી ન શકે.
બાળકીના ગાયબ થવા અને ત્યારબાદ લાશ મળી આવવાની ઘટના બાદ પોલીસે તાત્કાલિક કાર્યવાહી હાથ ધરી હતી. ઝીણવટભરી તપાસ અને પૂછપરછના અંતે પોલીસને આરોપી અનિલ દેવીપૂજક પર શંકા ગઈ અને તેની ધરપકડ કરવામાં આવી. પૂછપરછમાં અનિલે પોતાનો ગુનો કબૂલી લીધો હતો અને હત્યા પાછળનું કારણ અગાઉ થયેલો ઝઘડો હોવાનું જણાવ્યું હતું. પોલીસે હવે આરોપી વિરુદ્ધ હત્યા અને પુરાવાનો નાશ કરવાના આરોપસર કાયદેસરની કાર્યવાહી હાથ ધરી છે, જેથી તેને કડકમાં કડક સજા મળી શકે….કૌશિક પટેલનો રિપોર્ટ હિન્દ ટીવી