સુરતમાં અફઘાનિસ્તાનનો નાગરિક ઝડપાયો
બોગસ દસ્તાવેજોના આધારે ભારતીય પાસપોર્ટ બનાવવાના આરોપ
આરોપી મોહમદ આમીર જાવીદ ખાન મૂળ અફઘાનિસ્તાનના કાબુલનો
સુરતમાં એક અફઘાનિસ્તાનનો નાગરિક બોગસ દસ્તાવેજોના આધારે ભારતીય પાસપોર્ટ બનાવવાના આરોપસર ઝડપાયો છે. આ વ્યક્તિએ ગેરકાયદેસર રીતે ભારતીય પાસપોર્ટ મેળવી લીધો હતો.
સુરત ક્રાઈમ બ્રાંચે એક અફઘાનિસ્તાનના નાગરિક મોહમ્મદ આમિર જાવેદખાનની ધરપકડ કરી છે, જેણે બોગસ ભારતીય દસ્તાવેજોના આધારે પાસપોર્ટ મેળવી લીધો હતો અને સુરતમાં કાપડનો વેપાર કરી રહ્યો હતો. સુરત શહેરમાં રહેતા એક મૂળ અફઘાનિસ્તાનના નાગરિક વિરૂદ્ધ ચોકબજાર પોલીસ સ્ટેશનમાં ગુનો નોંધાયો છે. આ આરોપી પર ભારતીય નાગરિકતા સ્થાપિત કરવા માટે નકલી જન્મ પ્રમાણપત્ર બનાવી, તેના આધારે ખોટી રીતે ભારતીય પાસપોર્ટ, આધાર કાર્ડ, પાન કાર્ડ અને ચૂંટણી કાર્ડ જેવા મહત્ત્વના દસ્તાવેજો મેળવવાનો આરોપ છે. શ્રમ અધિકારીની કાર્યવાહી બાદ આ સમગ્ર કૌભાંડનો પર્દાફાશ થયો છે. તો આરોપી મોહમદ આમીર જાવીદ ખાન મૂળ અફઘાનિસ્તાનના કાબુલનો રહેવાસી છે.
હાલમાં આરોપી સુરતના જહાંગીરપુરા વિસ્તારમાં મલ્બાર પ્લસ બિલ્ડિંગમાં રહે છે. આરોપી મોહમદ આમીર યુ.એન. રેફ્યુઝી એજન્સી ઈન્ડિયામાંથી ભારતમાં રહેવા માટેનું કાર્ડ મેળવીને ભારતમાં વસવાટ કરતો હતો. પરંતુ ભારતમાં કાયમી વસવાટ અને નાગરિકતા મેળવવાની લાલચે તેણે ગેરકાયદેસર પ્રવૃત્તિઓ શરૂ કરી હતી. હાલ ક્રાઈમ બ્રાન્ચે તેની વધુ પુછપરછ કરી છે અને તેને ભારતીય પુરાવા ઉભા કરવામાં મદદ કરનારને વોન્ટેડ જાહેર કર્યો છે.