તાપીમાં રેતી ખનન દરમિયાન યુવાનનું ડૂબી જવાથી મોત

તાપીમાં રેતી ખનન દરમિયાન યુવાનનું ડૂબી જવાથી મોત
કુકરમુંડાના જૂના ગામ પાસે બની કરુણ ઘટના
તાપી નદીના ઊંડા પાણીમાં ડૂબતાં યુવાને ગુમાવ્યો જીવ
ઘટનાથી વિસ્તારમાં શોકની લાગણી ફેલાઈ
રેતી ખનન માફિયાઓની બેદરકારી સામે ઉઠ્યા સવાલ

કુકરમુંડા: તાપી જિલ્લામાં ફરી એકવાર રેતી ખનન માફિયાઓની ઘોર બેદરકારી સામે આવી છે, જેમાં એક નિર્દોષ યુવાને પોતાનો જીવ ગુમાવવો પડ્યો છે. કુકરમુંડાના જૂના ગામ પાસે તાપી નદીમાં રેતી કાઢવા માટે ગયેલા એક યુવાનનું

નદીના ઊંડા પાણીમાં ડૂબી જવાથી કરુણ મોત નીપજ્યું છે. આ ઘટના બાદ સમગ્ર વિસ્તારમાં ભારે શોક અને રેતી ખનન માફિયાઓ વિરુદ્ધ રોષની લાગણી ફેલાઈ ગઈ છે. ​શું છે સમગ્ર ઘટના? મળતી માહિતી મુજબ, ડોડુવા ગામનો રહેવાસી યુવાન યોગેશ પાડવી તાપી નદીમાં રેતી કાઢવાના કામમાં જોડાયેલો હતો. ઘટનાના દિવસે તે રેતી કાઢવા માટે વપરાતી હોડી (ડૉંગી)નો પાઇપ ખોલવા માટે નદીમાં ઉતર્યો હતો. આ કામગીરી દરમિયાન અચાનક પાણીના વહેણમાં તે ગરકાવ થઈ ગયો હતો. ઘટનાની જાણ થતા જ આસપાસના લોકો એકઠા થઈ ગયા હતા અને શોધખોળ શરૂ કરવામાં આવી હતી. અંતે, કુકરમુંડા પોલીસે ઘટનાસ્થળે પહોંચી ભારે જહેમત બાદ યોગેશ પાડવીનો મૃતદેહ બહાર કાઢ્યો હતો. સુરક્ષાના સાધનોના અભાવે ગયો જીવ આ ઘટના પાછળનું સૌથી ચોંકાવનારું પાસું એ છે કે, રેતી ખનનના માલિક દ્વારા કામદારોની સુરક્ષા માટે કોઈ પણ પ્રકારના સાધનો (સેફ્ટી ઇક્વિપમેન્ટ્સ) આપવામાં આવ્યા ન હતા. લાઈફ જેકેટ, સુરક્ષા દોરડા કે અન્ય તરણ સાધનોના અભાવે યોગેશ પાણીમાંથી બહાર નીકળી શક્યો નહીં. સ્થાનિકોના જણાવ્યા મુજબ, અહીં રેતી ખનન માફિયાઓ માત્ર નફાખોરીમાં વ્યસ્ત છે અને ગરીબ કામદારોના જીવ સાથે ખુલ્લેઆમ ચેડાં કરી રહ્યા છે. કામદારોને જીવના જોખમે પાણીમાં ઉતારવામાં આવે છે, છતાં કોઈપણ પ્રકારની સલામતીની વ્યવસ્થા કરવામાં આવતી નથી. પરિવાર પર આભ તૂટી પડ્યું યોગેશ પાડવીના નિધનને પગલે તેના પરિવાર પર દુઃખનો પહાડ તૂટી પડ્યો છે. ઘરનો મોભી ગુમાવનાર પરિવારમાં આક્રંદનો માહોલ છે. ગ્રામજનોએ માંગ કરી છે કે આ ઘટના માટે જવાબદાર રેતી ખનન માફિયાઓ સામે કડકમાં કડક કાર્યવાહી કરવામાં આવે. પોલીસ તપાસ અને કાર્યવાહી કુકરમુંડા પોલીસે મૃતદેહને કબજે કરી પીએમ માટે મોકલી આપ્યો છે અને આગળની તપાસ હાથ ધરી છે. શું રેતી ખનન કરનાર માલિક પાસે માન્ય પરવાના છે? શું કામદારોની સુરક્ષા માટે કોઈ પ્રોટોકોલનું પાલન કરવામાં આવે છે? આ તમામ મુદ્દે તપાસ અનિવાર્ય છે. જો તંત્ર દ્વારા આ મામલે કડક પગલાં ભરવામાં નહીં આવે, તો આવનારા સમયમાં આવા અનેક નિર્દોષ યુવાનો રેતી માફિયાઓની બેદરકારીનો ભોગ બનતા રહેશે. તાપી જિલ્લા વહીવટી તંત્ર અને માઈનિંગ વિભાગે મૃતકના પરિવારને યોગ્ય વળતર મળે તેવી માંગ ઉઠી છે…