સુરત ટ્રાફિક પોલીસનો ટાર્ટેગ પૂરો કરવા નવો કીમિયો

સુરત ટ્રાફિક પોલીસનો ટાર્ટેગ પૂરો કરવા નવો કીમિયો
ખાનગી કર્મચારીઓની મનસ્વી કામગીરી ફરી એકવાર વિવાદમાં
પીળા પટ્ટામાંથી બાઈક ખેંચી ટોઈંગ કરવાનો વીડિયો વાયરલ

સુરત શહેરના કતારગામ વિસ્તારમાં ટ્રાફિક પોલીસના કોન્ટ્રાક્ટ હેઠળ કામ કરતા ખાનગી કર્મચારીઓની મનસ્વી કામગીરી ફરી એકવાર વિવાદના ઘેરામાં આવી છે.

સુરતમાં ટ્રાફિક પોલીસના કોન્ટ્રાક્ટ હેઠળ કામ કરતા ખાનગી કર્મચારીનો સોશિયલ મીડિયા પર એક સીસીટીવી ફૂટેજનો વીડિયો વાઇરલ થયો છે, જેમાં જોઈ શકાય છે કે નિયમબદ્ધ રીતે પીળી પટ્ટીની અંદર પાર્ટ કરેલા ટુ-વ્હીલરને ક્રેનના કર્મચારીઓ બહાર કાઢીને બળજબરીપૂર્વક ટોઈંગ કરે છે. આ સમગ્ર મામલો ભારે વિવાદ પકડતા આખરે ટ્રાફિક વિભાગના ઉચ્ચ અધિકારીઓને આમાં દરમિયાનગીરી કરવાની ફરજ પડી હતી. ટ્રાફિક વિભાગના એસીપી વી.પી. ગામિતે સત્તાવાર નિવેદન આપતા જણાવ્યું કે, આ ઘટના 11 જુલાઈના રોજ કતારગામ વિસ્તારમાં આવેલી પટેલ ઇન્ડસ્ટ્રીયલ એસ્ટેટ ખાતે બની હતી. આ ઔદ્યોગિક વસાહતમાં ઘણી બધી અલગ-અલગ ઇન્ડસ્ટ્રીઝ અને કારખાના આવેલા છે. અહીં કામ કરતા અને કારખાના ધરાવતા લોકો અવારનવાર પોતાની બાઈકો ગલીઓમાં તેમજ આજુબાજુની જગ્યાઓ પર પાર્ક કરતા હોય છે. 11 જુલાઈએ કંટ્રોલ રૂમની હેલ્પલાઇન પર એક કોલર દ્વારા એવી ફરિયાદ મળી હતી કે, આ એસ્ટેટમાં આડેધડ ગમે ત્યાં પાર્કિંગ કરવામાં આવે છે, જેના કારણે ટ્રાફિક શાખા રીઝન-2ની એક ક્રેન ત્યાં તપાસ અર્થે મોકલવામાં આવી હતી.

જ્યારે ટ્રાફિક વિભાગની ક્રેન ઘટનાસ્થળે પહોંચી ત્યારે મૂળ ફરિયાદી ત્યાં જ હાજર હતા. તેમણે ક્રેનના કર્મચારીઓને જણાવ્યું હતું કે આ ઇન્ડસ્ટ્રીયલ એસ્ટેટ આગળ જે બાઇકો પાર્ક કરવામાં આવી છે તે બહારના લોકોની છે અને તેના કારણે સ્થાનિકોને પોતાના વાહનો મૂકવામાં ખૂબ જ તકલીફ પડી રહી છે. આ બાબતને ધ્યાને રાખીને ક્રેનના કર્મચારીઓએ ત્યાંથી બે બાઇકો ઉપાડી હતી. જો કે, થોડી જ વારમાં તે બાઈકના અસલી માલિકો પણ ત્યાં આવી પહોંચ્યા હતા. ત્યારબાદ ફરિયાદી અને બાઈક ચાલકો વચ્ચે પાર્કિંગ બાબતે જે સામાન્ય ઝઘડો અને ગેરસમજ હતી તેનું સ્થળ પર જ પરસ્પર સમાધાન થઈ ગયું હતું. આથી માનવતાવાદી અભિગમ અપનાવીને બંને બાઈકો દંડ વસૂલ્યા વિના પરત સોંપી દેવામાં આવી હતી. આ કેસમાં કોઈ જ દંડાત્મક કાર્યવાહી કરવામાં આવી નથી અને કોલરને સંતોષ થતાં ક્રેન ત્યાંથી રવાના થઈ ગઈ હતી…..કૌશિક પટેલનો રિપોર્ટ હિન્દ ટીવી