મહુવા તાલુકા પંચાયતમાં નવનિયુક્ત પદાધિકારીઓની વરણી

મહુવા તાલુકા પંચાયતમાં નવનિયુક્ત પદાધિકારીઓની વરણી
મહુવા તાલુકા પંચાયતમાં નવી ઇનિંગનો પ્રારંભ
ધારાસભ્ય અને સંગઠનની પ્રેરક ઉપસ્થિતિ

બારડોલી મહુવા તાલુકા પંચાયત પ્રમુખ પદે દેવેન્દ્રભાઈ પટેલ, ઉપપ્રમુખ તરીકે ક્રિષ્નાબેન ચૌહાણની સર્વાનુમતે વરણી થતા કાર્યકરોએ આતશબાજી અને હારતોરા સાથે વિજયોત્સવ મનાવ્યો

સુરત જિલ્લાની રાજકીય દ્રષ્ટિએ મહત્વની ગણાતી મહુવા તાલુકા પંચાયતના સુકાનીઓની વરણી પ્રક્રિયા આજે ઉત્સાહપૂર્ણ વાતાવરણમાં સંપન્ન થઈ હતી. લાંબા સમયથી જેમના નામો પર અટકળો ચાલી રહી હતી તે તમામ અટકળોનો અંત લાવીને પક્ષના મોવડીમંડળ દ્વારા નક્કી કરાયેલા નામોની સત્તાવાર જાહેરાત કરવામાં આવી છે. મહુવા તાલુકા પંચાયતના પ્રમુખ તરીકે દેવેન્દ્રભાઈ પટેલ અને ઉપપ્રમુખ તરીકે ક્રિષ્નાબેન ચૌહાણના નામો પર મહોર મારવામાં આવતા જ સમગ્ર પંથકના કાર્યકરોમાં ભારે હર્ષની લાગણી વ્યાપી ગઈ છે. તાલુકાના સર્વાંગી વિકાસને વેગ આપવા માટે અને વહીવટી તંત્ર પર પકડ મજબૂત કરવાના હેતુથી કારોબારી સમિતિના અધ્યક્ષ તરીકે પીઢ અગ્રણી દિનેશભાઈ પાનવાલાની વરણી કરવામાં આવી છે. આ ઉપરાંત, પંચાયતમાં પક્ષની પકડ મજબૂત રાખવા અને આંતરિક સંકલન જાળવી રાખવા માટે શાસક પક્ષના નેતા તરીકે ભાવિનભાઈ ચૌધરી અને પક્ષના દંડક (વ્હીપ) તરીકે સોનલબેન પટેલની નિમણૂક કરવામાં આવી છે. આ નવી ટીમ આગામી અઢી વર્ષ સુધી મહુવા તાલુકાના ગ્રામીણ વિકાસની ધુરા સંભાળશે.

મહુવા તાલુકા પંચાયત ભવન ખાતે યોજાયેલા આ ખાસ કાર્યક્રમમાં પ્રદેશ અને જિલ્લા કક્ષાના નેતાઓ ખાસ ઉપસ્થિત રહ્યા હતા. જેમાં સ્થાનિક લોકપ્રિય ધારાસભ્ય મોહનભાઈ ઢોડીયા, જિલ્લા ભાજપ પ્રમુખ ભાવિનભાઈ નાયક, સંગઠનના અગ્રણી જીનેશભાઈ ભાવસાર સહિતના ઉચ્ચ પદાધિકારીઓએ હાજરી આપી નવનિયુક્ત ટીમને પ્રોત્સાહિત કરી હતી. વરણીની સત્તાવાર જાહેરાત થતાં જ પંચાયત કચેરીની બહાર એકત્રિત થયેલા સેંકડો કાર્યકર્તાઓએ ઢોલ-નગારાના નાદ સાથે અને આતશબાજી કરીને વિજયોત્સવ મનાવ્યો હતો. તમામ નવનિયુક્ત હોદ્દેદારોને ફૂલહાર પહેરાવી, પેંડા ખવડાવી મોં મીઠું કરાવવામાં આવ્યું હતું…