રાજપીપળામાં ધારાસભ્ય ચૈતર વસાવા દોષી જાહેર

રાજપીપળામાં ધારાસભ્ય ચૈતર વસાવા દોષી જાહેર
ચૈતર વસાવાને કોર્ટે સંભળાવી 7 વર્ષની સજા
આપ ધારાસભ્ય ગોપાલ ઇટાલિયાની પ્રતિક્રિયા

નર્મદા જિલ્લાના દેડિયાપાડા વિસ્તારમાં વન વિભાગની જમીન સંબંધિત વર્ષો જૂના કેસમાં આજે તારીખ 23મી જૂને રાજપીપળા સેશન્સ કોર્ટે એક મહત્ત્વનો ચુકાદો આપ્યો છે. કોર્ટે આમ આદમી પાર્ટીના ધારાસભ્ય ચૈતર વસાવા તેમજ તેમની પત્ની સહિત કુલ 9 આરોપીઓને આ કેસમાં દોષિત જાહેર કર્યા છે. કોર્ટે ચૈતર વસાવાને 7 વર્ષની જેલની સજા ફટકારી છે.

સમગ્ર વિવાદ નવેમ્બર 2023માં નોંધાયેલી એક સત્તાવાર પોલીસ ફરિયાદ સાથે જોડાયેલો છે. આ ફરિયાદ મુજબ, ધારાસભ્ય ચૈતર વસાવા પર આક્ષેપ હતો કે તેમણે વન વિભાગના કર્મચારીઓને વાતચીત કરવા ઘરે બોલાવ્યા હતા. આ દરમિયાન તેમની સાથે મારામારી કરી હતી. એટલું જ નહીં, તેઓને સરકારી ફરજ કરતાં અટકાવીને, હવામાં ફાયરિંગ કરીને, તેમને જાનથી મારી નાખવાની ધમકી આપી હતી. આ ઘટના બન્યા બાદ ચૈતર વસાવા લાંબા સમય સુધી ફરાર રહ્યા હતા અને ઘટનાના 1 મહિના અને 9 દિવસ બાદ તેઓ પોલીસ સ્ટેશનમાં હાજર થયા હતા. આ કેસમાં લાંબી કાયદેસરની કાર્યવાહી અને ટ્રાયલ બાદ કોર્ટે આ ચુકાદો આપ્યો છે. આ મામલે માહિતી આપતા ઇન્ચાર્જ સરકારી વકીલ વંદના ભટ્ટે જણાવ્યું હતું કે, ‘આ કેસ વર્ષ 2023માં ફોરેસ્ટ ઑફિસર પર થયેલા હુમલા અંગેની છે. જેમાં ચૈતર વસાવા અને તેમની પત્ની સહિત કુલ 9 આરોપીઓ સામેલ છે. આજે કોર્ટે તમામ આરોપીઓને દોષિત જાહેર કરી સજા ફટકારવાનો આદેશ કર્યો છે

ભારતીય બંધારણ અને લોકપ્રતિનિધિત્વ અધિનિયમના નિયમો અનુસાર, જો દેશના કોઈ પણ સાંસદ અથવા ધારાસભ્યને અદાલત દ્વારા 2 વર્ષ કે તેથી વધુની જેલની સજા ફટકારવામાં આવે, તો તેમનું સભ્યપદ તાત્કાલિક અસરથી રદ થઈ જાય છે. રાજપીપળા કોર્ટે ચૈતર વસાવાને પૂરા 7 વર્ષની સજા સંભળાવી હોવાથી, કાયદાકીય રીતે તેમનું ધારાસભ્ય પદ હવે રદ થવાના આરે છે. હવે વસાવા પાસે હાઇકોર્ટમાંથી આ સજા પર સ્ટે મેળવવા સિવાય કોઈ વિકલ્પ બચ્યો નથી. આ મામલે ગોપાલ ઇટાલિયાએ શું કહ્યું સાંભળો

14 ડિસેમ્બર 2023 ના રોજ ચૈતર વસાવાએ મોટી સંખ્યામાં સમર્થકો સાથે આવીને પોલીસ સમક્ષ આત્મસમર્પણ કર્યું હતું. કોર્ટે તેમના 3 દિવસના રિમાન્ડ મંજૂર કર્યા હતા જાન્યુઆરી 2024 માં કોર્ટે ચૈતર વસાવાને શરતી જામીન આપ્યા હતા. આ કેસમાં ચાલેલી કાનૂની કાર્યવાહી બાદ રાજપીપળા સેશન્સ કોર્ટે ચૈતર વસાવા અને તેમના પત્નીને ફોરેસ્ટ કર્મચારી પર હુમલો કરવાના આ કેસમાં દોષિત જાહેર કર્યા છે…..કૌશિક પટેલનો રિપોર્ટ હિન્દ ટીવી